انا الحمامة ...
انا الحمامة اللي ياما اشتراني ولد في قلبه رحمة و طيرني
و رجعت وقعت في ايد الصياد ....
ما حرمتش امشي من طريق شبكته و ما حرمتش اجرب أخد لقمة العيش من غير ما أقع في الشبكة
انا الحمامة اللي ما حرمتش تبعد عن عين الصياد و تستخبى
عشان كانت عارفة ان فيه ولد في قلبه رحمة حيشتريها و حيطيرها تاني....
.ها يا "هنا" ايه رأيك انا شايفة ان اللي بفيونكة دي حلوة :
ترد "هنا" و هي زعلانة : لأ مش عجباني انا عايزة الفوشيا.
:انتي سمعتي بنفسك لازم يبقى لونها أبيض , انا شايفة ان اللي بفيونكة دي حلوة و حَتبقى مميزة .
:كلهم عليهم فيونكات و شبه بعض بس الفوشيا هي اللي شكلها مميز.
:و بعدين يا "هنا" نعمل ايه يعني ما ينفعش , يلا انا حَخلي الراجل يجيب لك ام فيونكة
تفضل "هنا" زعلانة و متعجبهاش ام فيونكة حتى بعد ما اشتروها و تفضل تفكر في البلارينة الفوشيا و انها كانت هتبقى مميزة اكتر و احلى و انها اصلاً ما بتحبش الباليه و ان البلارينة الفوشيا هي اللي كانت حَتخليها فرحانة و هي بتلعبه....
!ايوه يا أفندم؟
!: فنجان قهوة ع الريحة و منغير وش لو سمحت .
: حاضر يا أفندم .
فضلت عنيها متابعة الجارسون و هو رايح يودي الطلب , بعدين بصت على الشارع.
بعد شوية رجع و في ايده صينية عليها كنكة القهوة و فنجان على طبق ووقف قدامها بزيّه النبيتي المميز : اتفضلي يا أفندم
.: شكراً.
شربت اول شفطة و قالت في نفسها : دي مظبوطة و بوش !!
شافت نفس الامتعاض اللي على وشها على وش البنت اللي على الترابيزة الي قصادها و عرفت ان الطلبين اتبدلوا بالغلط مرضتش تحرج الجارسون و خصوصاً انه ممكن يتعرض لجزا عشان بدل الطلبين .
قعدت تفكر هتعمل ايه بعدين قررت تكمل فنجان القهوة , و تبدل القهوة اللي ع الريحة لأول مرة في حياتها بقهوة مظبوطة و بوش !!
