مرسال

رن جرس الباب
: جواب لحضرتك
:شكراً
استلمت الجواب و فتحته :


عزيزتي "مها" ..
انا اسف مش حقدر اجي في الميعاد اللي اتفقنا عليه .
الشغل هنا كتير أوي , ح حاول اجي في أقرب ميعاد .
تحياتي ,
أسامة.

كان عاشر جواب منه و عاشر تأجيل , ديماً جواباته قصيرة و سخيفة لا تحتوي الا على اعتذار و تأجيل و تحديد ميعاد غيره .
كان نفسها مرة تفتح جوابه تلاقيه بيسأل عن اخبارها و انها وحشته , او يتطمن عليها , أو يحكيلها عن حياته هناك عامل ايه ؟! و عايش إزاي ؟ أو حتى يقولها انه حايجي في الميعاد اللي اتفقوا عليه.
بقاله سنتين بيبعتلها مراسيل يقولها انه حيتأخر و عمرها ما ردت عليه و قالتله :
انا عارفة انك رجعت من سنة و نص و انك اتجوزت !
ــــــــــــــــــــــــــــــــــــــــــــــــــــــــــــــــــــــــــــــــــــــــ
إهداء لمي محمود عشان فكرتني بالجوابات